Presentación

Do mesmo xeito que para facer escola se debe coidar o contexto, vexo necesario presentarme nunhas poucas liñas co fin de que coñezades parte da traxectoria vital que me levará a reflexionar nesta bitácora. 

O meu nome é Miguel Ángel Fernández Rio, e actualmente estou estudando terceiro do Grao en Mestre de Educación Infantil da Facultade de Formación do Profesorado de Lugo. Este é, a pesar diso, o meu quinto ano cursando estudos relacionados co mundo educativo, pois con anterioridade realicei o Ciclo Superior en Educación Infantil.

Cinco anos vinculado á Educación, tras uns poucos nos que a miña vida non parecía seguir ningún camiño. O tempo detivérase, as forzas escaseaban e a policromía do mundo convertérase nunha miserábel escala de grises. Decidín comezar o Ciclo sen ánimos nin esperanzas, tan só coa idea de acceder a un traballo que me parecía sinxelo e cómodo naquel entón, pero a miña vida sufriu un cambio radical nesas clases.

Recoñezo que eu non tiña vocación, nin sequera me avergonzo ao dicir que cando comecei era un máis dos que pensa que a Educación Infantil é a tan utilizada “recorta, pinta e colorea”. Non sinto vergoña porque alí as miñas ideas mudaron e medraron, facéndome entender que non hai traballo máis importante que o de Mestre. E dígoo así, aínda co risco de parecer fachendoso, porque teño o pleno convencemento dilo. Eu mesmo no Ciclo tiven dúas grandes mestras, e só elas puideron salvarme da fonda crise na que me atopaba.

En canto á bitácora, son consciente das miñas limitacións e preciso que sexades coherentes coas expectativas. Quédame moita formación por diante e fáltame moita práctica; é evidente que non se converterá nunha bitácora de referencia a nivel educativo, pero tampouco é o obxectivo que persegue. Pretendo ofrecervos as miñas reflexións persoais, axudándome a min ao mesmo tempo ao verme obrigado a plasmalas co agarimo que merecen e, por suposto, estarei encantado das vosas aportacións e sempre disposto a debater. Non sei se é moito ou é pouco, pero é o que hai.

Finalizo dicíndovos un dos motivos que me impulsou a crear esta bitácora, e é que penso que todo Mestre debería de reflexionar, escribir e falar sobre Educación. As ideas, por moi boas que sexan, non existen ata que non se comparten. Axudádeme a construír e a construírme.